اسباب تساقط الشعر و علاجه

 السلام عليكم ورحمة الله وبركاته.

اهلا بيكم يا جلامورز معانا في مدونة جلامور جيرل glamour girl.

النهارده باذن الله هنتكلم عن تساقط الشعر أسبابه وعلاجه.

مبدئيا كده تساقط الشعر عرض مش مرض ومهما حطيتي حاجات موضعية بدون معرفة السبب الحقيقى يا التساقط هيفضل شغال يا هيقف واول ما توقفي العلاج يتساقط اكتر من الأول، وعلشان كده احنا النهارده هنحط أيدينا علي الاسباب ونشرحها. 

اولا العوامل الخارجية؛ 

زي شد الشعر ولازم نبطل نشد شعرنا لان كدخ البصيلة بتتضعف وتقع الشعرة او بتموت خالص ويحصل فرغات ونقول الشعر اتنحل 

الصبغة والبيبي ليس والسيشوار بيموتو الشهراية بالتالي تقع اسرع لازم نقلله ونعتني بالشعر 

الادوية زي المسكنات و مميعات الدم ادوية الضغط و القلب و الكوليسترول برضو من اعرضها الجانبية تساقط الشعر طبعا الأدوية ما ينفعش نوقفها ولا نقللها فهنا الحل ان احنا ما نبطلش علاجات الشعر ونفضل ماشين عليها ديما ممكن نغير كل كم شهر بين الأنواع. 

ثانياً اللغبطة الهرمونية ؛

زي بعد الولادة احنا في الحمل بيكون الشعر في أفضل حالاته لان الهرمونات الانثوية عالية وكمان بناخد فيتامينات ومهتمين ب تغذيتنا فا الشعر بيتقل وبيبقي تحفة، بعد الولادة دروب الهرمونات ورضاعة ومابنهتمش بتغذيتنا فنلاقي تساقط، هو هنا مش تساقط اوي هو الشعر بيرجع لطبيعته علي فكرة، والحل ان احنا ناخد فيتامينات أثناء الرضاعة و نهتم باكلنا زي الحمل بالظبط علشان الشعر ما يتأثرش اوي بالرضاعة 

كمان ان الهرمونات الذكورية تكون عالية زي في متلازمة تكيسات المبيض وهنا انزيم 5الفا ريداكتيز بيحول هرمون التستوستيرون ل هرمون ديهتدروتستوستيرون وده مع زيادة في الجسم بيعمل صلع وبيكون حله ان احنا ناخد زينك واوميجا 3 وفيتامين ب 2 لانهم بيقلل عمل الانزيم فا لبتالي نقلل ديهتدروتستوستيرون فاميحصلش صلع. 

ثالث سبب الضغط النفسي والاكتئاب والأمراض النفسية

 برضو سبب في تساقط الشعر وهنا المفروض نلجأ لطبيب نفسي مع طبعا البخاخات والعلاجات الموضعية للشعر لحين علاج المشكلة النفسية 

رابع سبب الأمراض العضوية؛ 

زي الأمراض المناعية وهنا الجسم بيهاجم نفسه فالبتالي الشعر بيقع بس مع اكتشاف المرض وعلاجه والبخاخات بيرجع الشعر تاني كويس 

كمان أمراض سوء التغذية من مسببات تسافط الشعر ما الشعر بالنسبة للجسم شئ ثانوي فاول حاجة بيتخلي عن تغذيتها لو الجسم في سوء تغذية 

يعني لو عندنا نقص مخزون الحديد شعرنا هيقع ومخزون الحديد ده غير الهيموجلوبين انا نفسي الهيموجلوبين عالي وعندي نقص حديد، 

و الزنك مهم والبروتين المكسرات والاوميجا3 والبيوتين وعائلة فيتامين ب منهم البيوتين ( ملحوظة صغننة الجسم مش بيستفيد من البيوتين غير في صورة سائلة علشان كده أطباء الجلدية بيكتبوه حقن مش كبسولات الكبسولة الجسم بيمتص 30٪ منها فقط) وفيتامين سي وفيتامين دال 

علشان كده من اهم الأطعمة لصحة الشعر الورقيات الخضراء، اللحوم الحمرا علشان الأحماض الأمينية والبروتين والحديد والزنك وفيتامين ب، الأسماك الدهنية علشان الاوميجا 3 وعلشان فيتامين دال الجسم مش بيمتصه غير في وجود دهون صحية، البيض علشان الزنك والبروتين، المكسرات والدهون الصحية والفواكه والخضروات الي فيها فيتامين سي، وشوربة العظم غنية جدا ب المغذيات و الكولاجين. 

كده احنا خلصنا الاسباب 

العلاج لازم نعالج السبب ولو السبب مش بيتعالج هنفضل نستخدم بخاخات الشعر 

لو بيتعالج كمان هناخد البخاخات ودي كتير جدا او حاجات طبيعية زي مغلي الكركديه و ماية البصل و الحنة والروز ماري وزيت الزيتون وزيت جوز الهند. 

بس في ملحوظة في تساقط الشعر بيكون ان الشعر بيقع اكتر من 500شعرة في اليوم الي هو ما تشوفيش المشط بعد ما تسرحي من كتر الشعر ويكون الشعر متسلك غير كده ما اسموش تساقط، في ناس شعرها بيخف بس لو عدت الشعر الي في المشط هتلاقيه مش معدي ال 100 شعرة ده مش تساقط وده موضوعنا المرة الجاية. 

لو في اي اسئلة سيبوها في التعليقات وشركو الموضوع علشان اصحابكم يستفيدو . 

مع السلامة نتقابل التدوينة الجاية ان شاء الله