دايت الصيام المتقطع بكل تفاصيله ( تطبيقه - فوائده)

ازيكم يا جلامورز النهارده هنتكلم عن الصيام المتقطع باذن الله نجاوب علي كل الأسئلة
الاول بس نفهم حاجة بيقولو ان السمنة مرض بس لو بصينا لها هنلقيها عرض مش مرض علشان كده كلنا دخلنا في دايرة مفرغة نتخن نعمل دايت نخس ونتخن تاني وهكذا لان احنا بنعالج العرض (السمنة) مش المرض
 طيب ايه اصلا الي بيخلينا نتخن علشان نعالجه وباذن الله نقضي علي زيادة وزننا وما نرجعش تاني
زمان كانت السمنة اقل كتير من دلوقتي ليه كان في ندرة في الاكل ومافيش اكل في الشارع والناس كانت بتاكل من وجبتين ل 3وجبات في اليوم وكلها معمولة في البيت بعدين ظهر الاسناك فبقت الناس تاكل سناك في وسط الوجبات
 وكمان ظهر الاطعمة المصنعة والمضاف لها سكر الناس زمان كانت بتاكل وتقعد فترات طويلة بدون اكل وبعدين تاكل الوجبه التانية لكن احنا كل ساعتين وفي ناس بتصحي بتفضل تاكل لحد ما تنام ده عمل لنا مشكلة اسمها مقاومة الانسولين ناكل اكل ويتحول لجلوكوز فالبنكرياس يخرج انسولين ياخد الجلكوز يدخله في الخلايا ونستخدمه في الطاقة والطاقة تتحرق العملية دي بتاخد من 4ل 8ساعة احنا ناكل قبل اصلا الحد الادني من الساعات الي هما 4 فالانسولين يعلي تاني وياخد الجلكوز يوديه الخلايا بس الخلايا اصلا عندها طاقة لسه وهكذا لحد ما في مرة الانسولين ياخد الجلكوز الخلايا تقوله لا شكرا مش عايزة البنكرياس يلاقي السكر عالي يطلع انسولين تاني برضو الخلايا مترضاش تخده وهكذا والانسولين اخر ما يزهق ياخد الجلكوز ويحوله لدهون ويخزنه في الخلايا الدهنية بالذات بتاعت البطن وهكذا كل ما ناكل.
 حاليا بقي عندنا خلايا مش عايزة انسولين (مقاومة للانسولين). وبقي عندنا جسم مفهوش طاقة لان خلاياه مش بتقبل للانسولين علشان يدخله جلكوز.
 وكمان عايزين ناكل حاجات مسكرة لان المخ متخيل ان ده حل عدم وجود الطاقة.
 وانسولين عالي موقف حرق الدهون.
و دي اول مشكلة بيحلها الصيام المتقطع.
 المشكلة التانية او المرض الثاني المسبب للسمنة سنة 94 تجربة اتعملت علي الفأران لما بيكلو لاقو في هرمون بيتم افرازه بيخليهم ما يكلوش لفترة بيقل يرجعو ياكلو تاني العالم الي اكتشفو قال بس انا لقيت حل للسمنة احنا هنحقن الناس التخان بالهرمون ده فيبطلو اكل ويخسو سهلة اهي الهرمون ده سماه اللبتين،
جاب مجموعة من الناس الي وزنها زايد بيحلل لهم لقي اصلا هرمون اللبتين عندهم اصلا عالي يانهار ابيض الناس دي مش بتخس ليه وزي ما قولنا علي الانسولين المفروض احنا بناكل فهرمون اللبنتين يعلي يعلي ويقول للمخ خلاص ادي أمر ان البني ادم ده يوقف اكل بعد حوالي 20دقيقة من بداية الاكل (علشان كده بيقولو كلو بالراحة وامضغو كويس) المهم المخ هنا بيدي امر للمعدة انها توقف انتاج هرمونا الجاي. دلوقتي المعدة مليانة اكل المفروض ان بعد 4ساعات هتبدأ حجمها يتقلص مرة تانية حبه حبه لحد ما تفضي خالص وفي هرمون تاني بيعلي حبه كل ما المعدة تتقلص اسمه الجرلين ( علشان كده بنقول الجوع المفاجئ مش جوع حقيقي) وبعد مثلا 6ساغات هنحس بجوع فناكل فالهرمون اللبتين يعلي ويبلغ المخ فالمخ يقول للمعدة وقفي الجرلين بالتالي احنا نقول الحمد لله ونبطل اكل. بس مع دخول الاسناكس احنا اصلا مش بنلحق نجوع هرمون الجرلين مش بيطلع ما المعدة مليانة اكل اصلا واحنا بنحشيها.
 بالتالي هرمون اللبنتين ديما عالي المخ بقي بيتذاكي ايه ده ازاي مش بنجوع لا ماينفعش الكلام ده انا هتجاهل هرمون اللبتين هو اه عالي بس انا ولا كاني شيفه بالتالي عملين نحشي معدتنا وتكبر واللبتين يعلي وناكل وناكل وناكل ومش بنحس بشبع وده المرض الثاني المسبب للسمنة (مقاومة اللبتين) حدوته طويلة معلش بس علشان نفهم
 ومن هنا ندخل علي فوائد الصيام المتقطع.
 1-علاج مقاومة الانسولين بنصوم فالانسولين يقل في الدم وبعدين لما ناكل ويرجع تاني يعلي مع الوقت بيخلي الخلايا حساسة للانسولين علشان كده يعتبر علاج للسكري من النوع التاني وفي ناس فعلا بتتعافي نهائي زي جرحات السمنة وبيدي نفس نتيجة جرحات السمنة.
 2- علاج مقاومة اللبتين ازاي لما بنصوم هرمون اللبتين بيقل وكمان في حاجة حتي فترات الاكل منفضلش ناكل لا نخلي بين الوجبات فترة يعني 3 5ساعات
. 3-زيادة هرمون النمو وده مهم لعمليات تجديد الخلايا وبناء العضلات .
4-تقليل الالتهاب في الجسم .
5- الالتهام الذاتي بيساعد الجسم يتخلص من الخلايا الي بدات تبوظ.
 6-حرق الدهون اكيد دي بعض اهم المزايا في الصيام المتقطع
 طيب كم عدد ساعات الصيام والفطار
 هو كذا خطه
 1- اول خطة 16ساعة صيام 8ساعات اكل
 2- الخطة التانية 18 ساعة و 6اكل
 3 - المحارب ودي بتكون 20ساعة و 4اكل وفي ناس بتصوم 24او 36او 48 بس انا مش بنصح بالزيادة عن 24ساعة وهنفهم ليه دلوقتي
 المراحل الي بيمر بيها جسمنا بعد ما نوقف اكل
 1- من اول من نبطل اكل لحد ساعتين انت مبسوطة شبعانة وجسمك بيحرق الاكل والانسولين بيعلي والسكر بيعلي.
 2- من 2 ل 5 ساعات الانسولين بيقل علشان يوصل للمعدل الطبيعي والجسم بيحرق الاكل الي كان دخله لسه حاليا بيخرق الكربوهيدرات .
 3-من 5ل 8ساعات الجسم بيطلع الجلكوز الي مخزنه علشان يجيب منه طاقة وبتحسي انك جعانة بس انت فعلا لسه عندك اكل بيتم هضمه الي هو الدهون والبروتين. 4- من 8ساعات ل 10الجسم بيحاول يجيب طاقة برضو بياخد دهون سهلة من مجري الدم تتحرق يخولها لطاقة. 5-من 10ل 12ساعة لسه برضو بيخلص الجليكوجين وده السكر المتخزن في الكبد علشان يلجئ له وقت الحاجة وبدات خلايا الدهون تفكك نفسها علشان تتحول لطاقة. 6-من 12ل 18ساعة جسمك خلاص غير مصدر طاقته وبقي بيحرق دهون (حالة الكيتوزس).
 7- من18ل 24ساعة جسمك شغال مخرقة دهون 8- من 24ل 36 اه الجسم بيحرق دهون وبيجدد خلاياه بس حس انه في مجاعة لو شم الاكل هيخزنه دهون علشان كده بقول بلاش نزود عن 24ساعة صيام ومش كل يوم. طيب ننفذه ازاي
 اولا ممكن نبدأ تدريجي يعني 12و 12 وكل اسبوع نزود ساعة لحد ما نوصل لل 16ساعة صيام بس مش هناخد فوايده ولا هننقص ووزن بشكل كويس غير لما نوصل ل 16.
 انا بطبقه ازاي سبت بصوم 16ساعة احد 18 اثنين 20 غالبا بصوم الاثنين اسلامي وبعيد تاني ثلاثاء 16 اربعاء 18خميس 20 ولما باكل الخميس مش بعمل صيام زي ما تقولو بخده فري والجمعة ببداءالصيام وبحسب 16ساعة للسبت
 هو لازم اصوم كل يوم في نفس المعاد؟ لا مش لازم خالص اي وقت توقفي في اكل ابدائي احسبي ساعات صيامك مافيش اي مشكلة.

 في مواعيد للصيام يعني انا نومي ملغبط لازم اصوم بليل او لازم اصوم الصبح؟ لا برضو هما 16ساعة متواصل تصوميهم الصبح تصوميهم بليل حسب وقتك وحسب رحتك.
 هو انا لو صومت 16ساعة في ال 8ساعات اكل الي انا عايزه كله؟ هو حسب هدفك بس احنا هنا بنتكلم عن فقدان الدهون فلا طبعا لازم نظامك الغذائي يكون محسوب السعرات وتقللي عن سعراتك المطلوبة 500سعر يعني لو جسمك محتاج 2000سعر علشان يكون وزنك ثابت هاتخدي 1500 مش عارفة تظبطي سعراتك هاتي نظام جاهز محسوب السعرات امشي عليه
 كمان افضل عدد ساعات فاصل بين الوجبات لتحقيق نتيجة عالية؟ افضل عدد ساعات 5 يعني تخدي وجبة كبيرة تستني 5ساعات تخدي وجبة كبيرة تانية وقبل الصيام تخدي سناك لو الفطار 8ساعات.
 لو 6وجبتين كبار. لو 4وجبة وسناك.
 اناصايمة 16/18/20 ساعة وماليش نفس اكل خالص معدتي مقفولة؟ كلي اكل صحي سعراته عالية مثلا وجبتك يكون فيها دهون صحية (زبدة طبيعي - سمن بلدي - زيت جوز هند - زيت زيتون) او كلي مكسرات بس لازم تخدي سعراتك علشان جسمك ميقللش الحرق بس ممكن يومن في الأسبوع نضخك علي الجسم وناخد 25٪من اجمالي سعرتنا ونصوم يعني لو جسمنا بيحرق 2000 ناخد يومين بس 500.
 ايه الاكل المسموح بيه وانا صايمة؟ بذمتك ده كلام في حد بياكل وهو صايم مافيش اكل مسموح بيه خالص، المسموح بيه القهوة والشاي والنسكافيه الكلاسيك او الجولد و المشروبات العشبية بدون سكر والماية وحتي السكر الدايت رغم انه مفهوش سعرات بس في أجسام ييتكسر صيامها بسببه، وانا عن نفسي باخد بولت بروف وانا صايمة ( قهوة عليها 10جرام زبدة طبيعي او زيت جوز هند) في ناس بتقول انها بتكسر الصيام بس بالنسبالي بالعكس تمام بحسها بطمن جسمي ان هيدخله اكل ليه لان الدهون المؤشر الجلايسيمي بتاعها صفر فمش بترفع الانسولين اصلا. ( المؤشر الجلايسيمي اي اكل في كربهيدرات او سكر له حاجة اسمها المؤشر الجلايسيمي وده بيقيس سرعة طلوع الانسولين والسكر في الدم الحاجات الي بتتحرق بسرعة زي الخبز الفينو مثلا مؤشر الجلايسيمي بتاعه عالي الخبز الاسمر المؤشر الجلايسيمي بتاعه اقل)
 اللعب رياضة امتي؟ اي حد هيقولك الابحاث بتقول كذا بيفتي الرياضة الي الان اجتهادات شخصية في مدربين كمال أجسام بيصومو 20ساعة وبيعلبو وهما صايمين عادي بعكس المتعارف عليه، فهقولك لو هتلعبي مقاومة ( اوزان) او كارديو لازم بعدها وجبة كاملة لانك بتبني جسمك لسه فلو قادرة تلعبي اخر ساعة في صيامك وبعدين تاكلي اوك لو مش هتدي التمرين حقه يبقي خدي اول وجبة وقبل تاني وجبة اللعبي تمرينك وكلي وجبتك ما تلعبيش ابدا رياضة بعد الصيام لانك هتجوعي جدا.
 انا بلعب قبل ما اكسر صيامي بس مش صيام اسلامي (لازم تكوني بتشربي ماية علشان ما تتعبيش) بشرب بولت بروف وبستني نص ساعة وبتمرن بخلص باخد وجبتي،
لو صيام اسلامي بستني الاذان واشرب ماية وبرلت بروف واتمرن وبعدين اكل مش بكون تعبانة وقادرة ادي تمريني حقه.
 مين الي ما ينفعش يعملو صيام متقطع؟ الناس الي عمرها تحت 18 سنة الحامل المرضع بالذات لو البيبي اقل من 6شهور مرضي السكري من النوع الاول (سكر الانسولين)
 اعتقد خلصنا اغلب الاجوبة عن الصيام المتقطع ولو حد عنده سؤال يتفضل يساله لو حد عايز نتكلم عن موضوع معين يقترحه برضو والسلام عليكم ورحمة الله دمتم جميلات