غسول توبي جينت سيبم للبشرة الدهنية والمختلطة ( غسول توبي جنت الازرق)

السلام عليكم ورحمة الله وبركاته يا جلامرز ريفيو النهارده عن غسول توبي جينت سيبم او توبي جيت الازرق للبشرة الدهنية والمختلطة

مبدئيا انا بشرتي دهنية صيفا مختلطة شتاء
اولا انا بحب منتجات ماكرو جروب يمكن علشان من زمان ماكنش قي غيرها في السوق المصري وبتقدم منتج كويس جدا.
نيجي لنجم اليوم ده مش اول استخدام له دي ثالث زجاجة ،
 في الصيف بستخدمه مرتين ، في الشتا بكتفي بمرة واحدة استخدامي له بالنسبالي في الصيف ماحستش باي شد في بشرتي وبرضو بشرتي نظيفة لكن في الشتا بحس بشد بسيط حولين الفم بيروح بمجرد ما ارطب بالنسبة للحبوب انا مش ييطلعلي حبوب غير هرمونية في اوقات معينة او حبوب بسبب حالتي النفسية مش حب شباب وبصراحة ممتاز مع الحبوب بس بتاخد وقت شوية لاني مش بستخدم غيره للحبوب وبعد ما بخلص باعود القطن بحط علي الحباية زيت شجرة الشاي وكان عندي اثر حباية رخمة مش راضية تروح راحت مع الاستخدام البثور السودا بتروح مع الاستخدام برضو بتاخد وقت مش من اول اسيوع حتي
 انا بحبه الغسول ده  لان مكوناته كمان كلها حلوة ولطيفة علي البشرة وطبيعية و هنتكلم عن مكوناته دلوقتي .
١- decyl glucoside ده بيتظف البشرة
 ٢- cocamidopropyl betaine ده مادة بتستخرج من زيت جوز الهند وبتعمل رغوة منظفة برضو
 ٣-allantoin ده بقي حكاية وحده ده مرطب ومقشر للبشرة بيقشر الطبقة الميته علشان الترطيب يوصل افضل للبشرة ده كمان بيهدي البشرة لو في حكة وكمان بيساعد الانسجة والندوب انها تلتئم
٤-البانثيتول ده سحر البشرة بقي مرطب بيساعد علي اللتئام الندوب بيمتص الماية من الجو علشان يرطب الجلد بيحافظ علي الكولاجين والايلاستنح في البشرك
 ٥-خلاصة الريحان وهي مطهرة للبشرة وبتهدي وبتمنع الحبوب ولتنظيم افراز دهون البشرة
٦-خلاصة الاولفيرا مرطب وبرضو بتمنع الحبوب
 ٧-خلاصة الشاي الاخضر علشان تنظم افرازات الدهون وللحبوب
٨- عسل مش هنتكلم عنه
٩- اسكروبك اسيد الي هو فيتامين سي برضو مش هتكلم عنه اكيد عارفينه
 ١٠ - زيت الزعتر مطهر للبشرة وبينشف الحبوب
 ١١- خلاصة شجرة الشاي طبعا عارفين فوايدها للبشرة
 ١٢-جلايكولك اسيد وده حمض بيقشر البشرة علشان تفضل ناعمة وشابه ديما وبيساعد ان البثور البيضا تختفي مع الوقت
١٣-سلساليك اسيد حمض بيقشر البشرة برضو وبيساعد ان البثور السودا تروح انا اول مرة اشوف الجلايكولك والسلساليك اسيد  في غسول واحد هما تركزهم بسيط طبعا بس فعلا مع الاستمرار هتحسي بفرق بشرتك
 ١٤- جلسرين مش هتكلم عنه برضو انتو اكيد عرفينه

هو مافهوش سلبيات؟
 بالنسبالي لا مافيش غير حاجة واحدة ان سعره زي الدهب كل يوم بسعر اول مرة اشتريته كان بحاجة وخمسين تاني مرة كان ب ٧٥ثالث مرة ٩٥وسمعت انه وصل ل ١٠٥ هو اه بمب واحدة بتكفي وشي كله وبيقعد فترة بس برضو دي حاجة مضيقاني ولما بينزل عليه عرض واحد واحد هدية مش بيكون قرب يخلص فمش بشتري
فتبعي العروض وهاتي منها افضل طيب الاسئلة الشهير طريقة الاستخدام؟ باخد بمب واحدة في كف ايدي بوزعه علي التي زون الاول وبعدين علي باقي وشي مش بنسي رقبتي بعدين بغسل بالفرشة بتاعته بحركات دائرية وبرضو ببدأ بالتي زون لمدة دقيقة وبشطفه وعادي تحسي مش مرغي علي بشرتك اوي هينظف برضو
ينفع استخدمه في الشتا.؟ اه انا بستخدمه عادي مرة واحدة لاني مش بخرج كتير
 استخدمته وطلعلي حبوب؟ بناء علي كلام دكتورتي كده كده كانت هتطلع بس هو عجل ظهورها
 هيضيع الرؤس السودا والبيضاء؟ ايوة بس بياخد وقت هيضيع الحبوب الي تحت الجلد ويخلي بشرتي صافية؟ اه بس برضو هياهد وقت
وقت اد ايه؟ من اسبوعين لشهر حسب عنايتك ببشرتك ومشاكلها والروتين الاسبوعي بتاعك
بشرتي حساسة لكن دهنية او مختلطة استخدمه؟ انا بشرتي حساسة ماعمليش اي مشاكل بس كل بشرة تأثرها غير التانية
يا رب اكون جاوبت علي الاسئلة الي في دماغكم واسفة للاطالة بس علشان يكون موضوع كافي ووافي كل الجوانب